සුදර්ශන ගුණවර්ධනජනාධිපතිවරණය ප‍්‍රකාශයට පත්කිරීමත් සමඟ ම රාජ්‍ය මාධ්‍ය ද එම මාධ්‍ය හසුරුවන දැළි පිහි අතින් ගත් හෙංචයියන් පිරිසද තමා මෙතෙක් කලක් කරගෙන ගිය මඩ මෙහෙයුම දෙගුණ තෙගුණ කර තිබේ.
මේ මෙහෙයුම මෙසේ දියත් වන්නේ, ජනාධිපතිතුමා මාධ්‍යවේදීන් අරලියගහ මන්දිරයට කැඳවා ඡන්ද සටන මඩ ගැසීම් වලින් තොරව ගෙන යමු යැයි ප‍්‍රකාශ කොට තිබියදීය.
පසුගිය කාලය තිස්සේම විපක්ෂ නායකවරයාට, ආණ්ඩුවට විරුද්ධව කට අරින අතළොස්සක් වූ විපක්ෂ මන්ත‍්‍රීන්ට, ජනමාධ්‍ය ක‍්‍රියාකාරීන්ට සහ විසම්මුතික මත දරණ සිවිල් සංවිධාන නායකයින් වෙත ලෝබ නැතිව එල්ල කළ මඩ බාල්දි ප‍්‍රහාරය දැන් යුද්ධය දිනූ මහා සෙන්පතියා වෙත ද එල්ල කිරීමට පටන් ගෙන ඇත.
ජනමාධ්‍ය සහ මාධ්‍යවේදීන් සැලකුණේ ජනතාවට යථාර්ථය වටහා ගැනීමට අවශ්‍ය දැනුම හා තොරතුරු සපයන ඉදිරිගාමී පිරිසක් වශයෙනි. නමුත් ශීඝ‍්‍රයෙන් එම භුමිකාව වෙනස් වී ගොස් අද මාධ්‍යවේදියා යනු ජනතාවට විනෝදය සපයන්නෙකු බවට පත්වී ඇත. එදා ප‍්‍රවෘත්ති කියැවුවේ, ශ‍්‍රවණය කළේ, නැරඹුවේ තොරතුරු ලබා ගැනීමට නම් අද එය කරන්නේ විනෝදය පිණිසය. පොදුවේ ගත් කළ මාධ්‍යවේදියා තවදුරටත් සමාජය වෙත පරමාදර්ශයක් සපයන පුද්ගලයෙකු නොව මිහායිල් ෂොලහෝව් ගේ ‘පෙරළූ නැවුම් පසෙ’ හි එන ෂුකාර් සීයා වැනි චරිතයක් බවට පත්ව ඇත.
යුද්ධයේදී මිනිසුන් විශේෂයෙන් දෙමළ මිනිසුන් මිය යන විට, අතපය අහිමි වන විට, ඔවුන්ගේ ගේ දොර වතුපිටි විනාශ වන විට ඒ ගැන කිසිදු සඳහනක් නොකොට, යුද්ධය තලූ මරමින් පේ‍්‍රක්ෂකාගාරයට, ශ‍්‍රාවක සමාජයට සහ පාඨක සමාජයට ගෙන ආවේ මාධ්‍යවේදීහුය.
ආණ්ඩුවේ සහ ආණ්ඩුවට හිතවත් මාධ්‍ය මේ ආකාරයේ මාධ්‍ය භාවිතයක යෙදීම ගැන අප පුදුම විය යුතු නැත. එයට හේතුව ආණ්ඩුව මෙහෙයවන අය ජීවත්වන්නේ ශිෂ්ඨාචාරයට පුර්ව යුගයේ බැවිනි. මානව ශිෂ්ඨාචාරය විසින් පිළිගෙන වර්ධනය කරන ලද මානව අයිතිවාසිකම්, නීතියේ ආධිපත්‍යය වැනි සංකල්ප තමන් තුට්ටුවකට මායිම් නොකරන බව ඔවුන් නැවත නැවතත් භාවිතයෙන් ම පෙන්නුම් කරන බැවිනි.
එහෙත්, විපක්ෂයෙන් එයට වඩා ඉහළ හැසිරීමක් බලාපොරොත්තුවීමට අපට අයිතියක් ඇති අතර, එය ඉටුකිරීමේ වගකීමක් විපක්ෂයට ඇතැයි අපි සිතමු. මක් නිසාද යත් ආණ්ඩුව මෙන් නොව විපක්ෂය මිනිස් ශිෂ්ඨාචාරයේ අග‍්‍ර ඵල වන මානව හිමිකම් සහ නීතියේ පාලනය පිළිගන්නා බවට පොරොන්දු වී ඇති බැවිනි.
ජනාධිපතිවරණ සටනේදී ආණ්ඩුව වෙනුවෙන් සටනට බැස සිටින චම්පික රණවක ඇමතිවරයාට ආපහාස වන ආකාරයට ඔහුගේ පෞද්ගලික ජීවිතය සම්බන්ධ යැයි හැෙඟන ආකාරයේ අශ්ලීල විස්තරයක් පසුගිය බදාදා එක්තරා වෙබ් අඩවියක පළ විය. ඡන්ද සටනේදී තම ප‍්‍රතිවාදියාගේ ආධාරකරුවකු ගේ යටි බඩට ඇණීම මඟින් බලාපොරොත්තු වනු ඇත්තේ ඔහුගේ විශ්වාසනීයභාවය බිඳ දැමීම හෝ ඔහු නිහඬ කිරීම විය හැකිය. එමඟින් විපක්ෂයේ පොදු අපේක්ෂකයා ට වාසියක් සැලසීම එම ලිපිය ප‍්‍රකාශයට පත් කිරීමේ අරමුණ විය හැකිය.
චම්පික රණවක ඇමතිවරයා සහ ඔහු නියෝජනය කරන මතය පැරදවිය යුතුය. නමුත් එය කළ යුත්තේ මතවාදී අරගලයක් මඟිනි. එසේ නැතිව මෙවැනි අශ්ලීල පහරදීම් මඟින් නොවේ. සෑම මනුෂ්‍යයෙකුටම හිමි මානව අයිතිවාසිකමක් වන පවුල සහ පෞද්ගලිකත්වයට ඇති අයිතිය චම්පික රණවක ඇමතිවරයාටත් හිමිවිය යුතු අතර සමාජය ඒ වෙනුවෙන් පෙනී සිටිය යුතුය. මාධ්‍යවේදීන් එම අයිතිය පැහැර ගැනීම හෙළා දැකිය යුතුය. එමඟින් එවැනි ක‍්‍රියා මින් ඉදිරියට සිදු කිරීමට යමෙකු ක‍්‍රියා කරන්නේ නම් එය අධෛර්යය කළ යුතුය.
ඉහත වෙබ් අඩවිය විසින් චම්පික රණවක ඇමතිවරයා ගේ පෞද්ගලික චරිත ඝාතනය කිරීම විපක්ෂයේ දේශපාලන පක්ෂ විසින් හෙළා දැකිය යුතුය යි අපි යෝජනා කරමු. ආණ්ඩුව හා ආණ්ඩුවේ මාධ්‍ය වැටී තිබෙන පහත් තත්ත්වයට ප‍්‍රතික‍්‍රියා දැක්විය හැක්කේ, විපක්ෂය ද එම තත්ත්වයට වැටීමෙන් නොව ඊට වඩා ඉහළ පරමාදර්ශයන් වෙනුවෙන් පෙනී සිටීමෙනි. ශිෂ්ඨ සම්පන්න ශ‍්‍රී ලංකාවක් අපේක්ෂා කරන මහජනයා විපක්ෂයේ දේශපාලන පක්ෂවලින් බලාපොරොත්තු වන්නේ එයයි.
Back to Home...
View Pdf...
No comments:
Post a Comment