රාජ්‍ය රහස් හෙළිකිරීම
යුද්ධයේ අවසාන අදියරේදී එල්.ටී.ටී.ඊ දේශපාලන අංශයේ නායක නඬේසන්, සාම මහ ලේකම් කාර්යාලයේ නායක පුලිදේවන් සහ රමේෂ් ඇතුළු කණ්ඩායමක් සුදු කොඩි රැගෙන ශ‍්‍රී ලංකා හමුදාව වෙත යටත්වීමට පැමිණි බවත්, එසේ වුවද යටත් වීමට ඉඩ නොදී ඔවුන් ඝාතනය කරන ලද බවත් පිළිබඳ වූ කතා ප‍්‍රවෘත්තියට නැවත පණ ලැබී, තටු ගසා, ගුවන සිසාරා පැතිරෙන්නට වී ඇත.
මෙම කතාව කරළියට එන්නේ යුද ජයග‍්‍රහණය සඳහා වගකිවයුතු සේනාධිනායකයා වු මහරජතුමාද, සෙන්පතියා වූ ජෙනරාල්තුමාද ප‍්‍රතිමල්ලවයන් වශයෙන් ජනාධිපතිවරණ සටනට අවතීර්ණ වී
ඇති පසුබිම තුළය.සන්ඬේ ලීඩර් පුවත්පත සමඟ පවත්වන ලද සම්මුඛ සාකච්ඡාවකදී ජෙනරාල්තුමා මේ පිළිබඳව පළ කළා යැයි කියන අදහස් නිසා ඇති වූ තත්ත්වය දෙබර කූඩයකට ගල් ගැසුවා සේ විය. ‘මගෝ ඩිගො ඩයි’ චිත‍්‍රපටයේ චරිත නිරූපනයට පවා සුදුසුකම් දක්වන්නා වූ ආණ්ඩුවේ ප‍්‍රකාශකයන් බුරුත්තක්ම එම ප‍්‍රකාශයට විරුද්ධව ගුවන් තරංග මඟින් යුද්ධ ප‍්‍රකාශ කරන ලදි. ඔවුන් කියා සිටියේ එම ප‍්‍රකාශය යුද රහසක් හෙළිදරව් කිරීමක් බැවින් ජෙනරාල්තුමා දේශද්‍රෝහියෙකු බවයි. ආණ්ඩුවට හිතවත් නීතිඥවරුන් ප‍්‍රකාශ කළේ ජෙනරාල්තුමාට විරුද්ධ ව රාජ්‍ය රහස් පනත යටතේ නඩු පවරා ඔහු සිරගෙට වුවද යැවිය හැකි බවයි.
කෙසේ වුවද,තමා එවැනි ප‍්‍රකාශයක් නොකළ බවත්,තම ප‍්‍රකාශය සන්ඬේ ලීඩර් පුවත්පත විසින් විකෘති කොට පළ කොට ඇති බවත් පසුව පැවති ප‍්‍රවෘත්ති සාකච්ඡාවකදී ජෙනරාල්තුමා ප‍්‍රකාශ කළේය. යුද්ධය මෙහෙයවූයේ තමා බැවින් එහි සියළු වගකීම් තමා භාරගන්නා බව ප‍්‍රකාශ කළ ඔහු වැඩිදුරටත් පැවසුවේ යුද්ධයේ අවසාන අදියරේදී කිසිවෙකුත් සුදු කොඩි රැගෙන යටත්වීමට නොපැමිණි බවයි.
ජෙනරාල්තුමා රාජ්‍ය රහස් හෙළිදරව් කර ඇතැයි රජයේ ඇමතිවරුන් විසින් ප‍්‍රකාශ කිරීම මඟින් ඉහත දැක්වෙන ආකාරයේ ඝාතනයක් සිදු වී ඇති බව රජය අනියම් ලෙස පිළිගෙන ඇතැයිද එය රටට අවාසිදායක යැයිද විදේශ ඇමතිවරයා කී බව වෙබ් අඩවියක පළ විය.තවත් වෙබ් අඩවියක පළ වූයේ ඉහත දැක්වෙන ආකාරයේ සිදුවීමක් නොවූ බව දැන් ජෙනරාල්තුමා විසින් ප‍්‍රකාශ කර ඇති බැවින් ප‍්‍රශ්නය මෙතනින් අවසන් කළ යුතු බව රජයේ ඇමතිවරුන් ප‍්‍රකාශ කර ඇති බවයි.
මෙහිදී පුරවැසියන් වශයෙන් අප විසින් ඇසිය යුතු ප‍්‍රශ්න කිහිපයක් වෙයි.
1. පසුගිය කාලයේ ලංකාවේ සියළුදෙනාම පාහේ දැනසිටි කරුණක් හදිසියේම රාජ්‍ය රහසක් බවට පත්වූයේ කෙසේද?
2. යුද්ධයේ අවසානය සිදු වූ ආකාරය රූපවාහිනි සහ වීඩියෝ දර්ශන ඔස්සේ හැමදෙනාම දන්නා තත්ත්වයක් යටතේ මේ ඊනියා රහස වසන් කරන්නට හදන්නේ කාගෙන්ද?
3. සෙසු මහජනයාට වඩා කලින් නිවැරදි තොරතුරු දැන ගැනීමට හැකියාවක් ඇති සත්ත්ව විශේෂයක් වන මාධ්‍යවේදීන් මේ ප‍්‍රශ්නයේදී කිසිවක් නොදන්නා ආකාරය අනුව ඔවුන් බබාලා පිරිසක්ද? (විශේෂයෙන්ම ජ්‍යේෂ්ඨ මාධ්‍යවේදිනී ෆෙඞ්රිකා ජෑන්ස් උක්කුං බබෙක්ද?)
4. මෙය අසා නින්දෙන් ඇහැරුනා සේ හැසිරෙන ඇමරිකාව, බි‍්‍රතාන්‍යය ප‍්‍රමුඛ ජාත්‍යන්තර ප‍්‍රජාව සිදු වූ කිසිවක් නොදන්නා තොත්ත බබාලා පිරිසක්ද?
ඉල්ලාගත් කේතලය
මෙහිදී අපගේ සිහියට එන්නේ ඇමරිකාව ප‍්‍රමුඛ මිත‍්‍ර හමුදා විසින් ඉරාකයට පහරදීම සාධාරණීයකරණය කිරීමට යොදාගත් තර්කනය පිළිබඳව ස්ලාවෝ ජිජැක්ගේ විග‍්‍රහයයි. සිග්මන් ෆ්‍රොයිඞ් සිහින තේරුම් කිරීම පිණිස යොදා ගත් ‘ඉල්ලාගත් කේතලය’ පිළිබඳව පැරණි විහිළු කතාවක් ජිජැක් මෙහිදී උපුටා දක්වයි.
කිසියම් පුද්ගලයෙකුගෙන් කේතලයක් ඉල්ලාගත් අයෙක් ඵ් පිළිබඳව පහත සඳහන් පිළිතුරු ලබා දෙයි.
1. මම කවදාවත් ඔබෙන් කේතලයක් ඉල්ලා ගත්තේ නැත.
2. මම කේතලය ආපසු දෙනවිට එය බිඳී තිබුණේ නැත.
3. මම ඔබෙන් කේතලය ඉල්ලා ගන්නා විටත් එය බිඳී තිබිණි.
මේ සෑම පිළිතුරකින්ම වසා දමන්නට තැත් කරන්නේ එක් කටුක සත්‍යයකි. එනම්, ඔබෙන්
ඉල්ලාගත් කේතලය මා අතින් බිඳුණු බවයි. එකිනෙකට නොගැලපෙන මේ සියළු පිළිතුරු මඟින් උත්සාහ කරන්නේ අප දන්නා ඵ් සත්‍යය නොදැනුමක් බවට පත් කිරීමටය.ස්ලාවෝ ජිජැක් ප‍්‍රකාශ කරන්නේ ඉහත දැක්වෙන එකිනෙකට නොගැලපෙන ස්වභාවය ඉරාකයට පහරදීම සාධාරණීයකරණය කිරීමට යොදාගත් තර්කයන්හිද පවතින බවයි.
පළමුව ප‍්‍රකාශ වූයේ ඉරාකයේ සදාම් හුසේන්ගේ රෙජීමය සහ අල්කයිඩා සංවිධානය අතර සබඳතාවයක් පවතින බැවින් ඉරාකයට පහරදිය යුතු බවයි. දෙවනුව, සමූල ඝාතක අවි (WMD) ඉරාකය සතුව තිබීම හේතුවෙන් මුළු ලොවටම සහ විශේෂයෙන්ම ඇමෙරිකාවට සහ බි‍්‍රතාන්‍යයට සදාම් හුසේන් රෙජීමය තර්ජනයක් බවයි. කිසිදු සමූලඝාතක අවියක් හමු නොවූ විට මිත‍්‍ර ජාතීන් ඉදිරිපත් කළ තර්කය වූයේ එවන් භයානක අවි හමු නොවූ බව සත්‍යයක් නමුත් සදාම් හුසේන් වැනි ප‍්‍රජා පීඩකයෙකු පෙරළා දැමීමට වෙනත් හේතු ඕනෑ තරම් පවතින බවයි.
සුදු කොඩි රැගෙන ආ පිරිසක් ඝාතනයට ලක්වීම පිළිබඳව කෙරෙන කතා බහ විමර්ශනය කරන විට ඵ් පිළිබඳව තර්ක ගොනු කිරීම සිදුවන්නේද ඉල්ලා ගත් කේතලය ආපසු දීමේදී නිදහසට කාරණා ඉදිරිපත් කළ පිළිවෙළටමය.එම හැම තර්කයකින්ම ප‍්‍රකාශ වන්නේ එමඟින් සඟවන්නට උත්සාහ දරන අප දන්නා කටුක සත්‍යයමය.
ප‍්‍රශ්නය වන්නේ කවුරුත් දන්නා මේ රහස සඟවන්නට උත්සාහ ගන්නේ ටී.ලොබ්සොං රම්පෝගේ ‘තෙවැනි ඇස’ වැනි අප දෙස බලා සිටින අදෘශ්‍යමාන බලවේගයකින්ද?
Back to home
View Pdf...
මට තියෙන ප‍්‍රශ්නය මාධ්‍යවේදීන්ට අවංකවම ජාතිවාදී වෙන්න පුළුවන්ද කියලා සහ එහෙම වෙච්ච අය මාධ්‍යවේදීන්ද කියලයි.
අසඩක් - ඊට කලින් මහාධිකරණය දැන ගැනීමට ඕනි මුන්නැහැගේ ගාස්තුව කීයද කියල.පළමු නීතිඥයා - මේ ප‍්‍රශ්නය ටිකක් අසාමාන්‍ය ප‍්‍රශ්නයක් මහාධිකරණ තුමනි. ඒ ගැන දැනගන්න අවශ්‍ය ම නම් මගේ ගාස්තුව රීදි 500යි.
.jpg){kind=link}